Ovih sam se dana z nekim starim pajdašima podsetil kak smo negda znali obilaziti koprivničke birtije, ali naravno i one nekaj malo dalje, da pronajdemo kakav dobar zalogaj i kakav dobar gemišt. Teško mi je sad baš usporediti kvalitetu ponude onda i danas ali mislim da ni negda ni bilo teško pronajti mesto gde se čovek mogel dobro osečati i biti zadovoljan z ponuđenim delicijama. Morti su danas restorani malo “glamurozniji” ali smo mi v ono vreme bili zadovoljni jer puno nismo ni očekivali. Bila je važna klopa a negdi i zgodna konobarica. Malo al čoveka veseli.
Nekadašnja koprivnička ugostiteljska ponuda (1)
Ozbiljna gospoda kak sam ja, sigurno se buju setila jedne stare birtije “Pri Grahovčini”. Smeštena na današnjem Trgu Leandra Brozovića, bila je pravo oličenje domače atmosfere, posebno zato kaj smo gazdaricu i zvali “mama Grahovčina”. Imala je nekaj majčinsko v sebi sve do momenta dok nije izrekla cifru za ceh koji smo napravili. To vam je ovak zgledalo. Popijemo po čokanj rakijice, pojedemo friške čvarke z lukom i dve prge, popijemo nas trojica svaki po dva-tri gemišta i iščemo račun. Onda sledi ovo:“Joj deca kaj bi vam opče računala? Jel vam puno sto dinara?” Naravno da nam je bilo puno al kaj smo mogli drugo nego dojti pak sutra. Istini za volju imala je navek dobar gemišt pa su k njoj rado navračali mnogi učitelji z obližnjih školi. Grahovčina je dugo bilo i mesto gde su zaposlene familije mogle dojti po obed ze svojim porcijama i odnesti si doma. Za vreme rata na tom je mestu bil “Cvrčak”, jako popularno okupljalište i mladih i nekaj stareših gostiju al se nije baš mogel pofaliti z nekakvom prihvatljivom ponudom papice.
“Jurenca” buju stareše generacije još dugo spominjale jer je to bilo nezaobilazno mesto za izlazak v petek navečer ali i mesto za jutarnju kavu i pelinkovec v subotu v jutro. Birtija se zapraf zvala “Zagorje” al to gosti nisu ni znali. Za kraj tjedna ni trebal nikakav dogovor gde se bumo našli. Ak nemaš nekakav neodgodiv posel znalo se da je obavezan dolazak k Jurencu. Njemci su odavno zmislili ime za takvo “obavezno okupljanje” određenoga dana v određeno vreme: “Stamtisch”, kaj če reči v slobodnom prevodu „stol za stalne goste”. Bila je to tipična gemištaška birtija z jako skromnom ponudom kakvoga zalogaja. Ruku na srce mi i nismo tu očekivali bečki šnicl ili nedaj bože škampe na buzaru. Ono kaj smo iskali Jurenec je imal: domače suhe kobase, prge i negda-negda klipiče. Sedneš za stol, pričekaš pajdašiju, mam je kraj nas Marica ili Bernarda, i sledi naruđba:“Nekaj nareži i daj litru i vodu”.Ni trebalo ni vilice ni noža bilo je dosta i par čačkalici. I tak nekolko put ak nas je bilo više.
Pajdaška ekipa jedne davne večeri pri Jurencu
“Turist” je bil mesto gde smo dolazili uglavnom na kasni gemišt jer je to bil jedini lokal gde si nekaj kasneše mogel dobiti nekaj za popiti. Tu se ni baš često jelo osim kaj se tu i tam pojel kakav gablec. Ak si imal sreču da te dvori Pačko onda je to ovak zgledalo. Naručimo paprikaš z rezancima a Pačko donese čušpajz grah z kobasom. “Pačko. Al mi nismo to naručili.” Odgovor v Pačkinom stilu:”Jedite to kaj sam donesel. To je danas najbolje na jelovniku”. Iščeš račun a onda sledi: “Dva graha, dve pive i gemišt!” “Pačko nismo imali gemišt”. “Znam. Gemišt je za Pačku”. I kak da mu ne platiš taj gemišt. Bojim se da v Koprivnici takve domače birtije više nema. A zakaj bi i bila kad više nisam niti gost kak negda.
Hotel “Podravka” je pak bil čist nekaj drugo. Tu je več bila ozbiljna ekipa konobara, ponuda je bila v rangu svih takvih hotela v severozapadnoj Hrvatskoj al je bil kakti elitno mesto za izlaske svetkima ili obavezno v subotu. V hotelu se okupljalo mešano društvo, kaj če reči da smo na večernje izlaske pozivalei naše dekle jer je to nekak bil v to vreme običaj. Imali smo navek jedan te isti stol, navek nas je bilo desetak i više i kak smo bili jako dobri gosti, oni zavidni su nas nazvali “Glembajevi”. Konobari nas nisu ni pitali dal v subotu navečer dolazimo nego bi mam na dupli stol deli “Rezervirano”. Skoro pa pravilo je bilo da tu nekaj i povečeramo. Bil bi to bogati mešani roštilj ili pak jedan poveči oval pršuta i sira. Tu i tam su nam zmešali tatarski biftek. Tek tolko da čovek more popiti z guštom čašu vina. Dobro se sečam je v to vreme bilo jako popularni vino “Cviček” koj je nama Podravcima pasal jer je imal pravu dozu kiseline. Nedela v jutro je pak bila obavezna “matineja”. Dolazilo se prije nedelnoga obeda po novine, na kavu i na aperitiv.Trajalo je to dost dugo dok se nekak nisu za ove naše mlade države počeli masovno otpirati kafiči. Danas je hotel interesantan samo starešoj ozbiljnjoj gospodi. V tom sam hotelu provel nekaj vremena kak muzikant al verujte da sam i dalje ostal dobar gost. Više nisam redovito večeral kak gost nego bi se obično pri onim dragim kuharicama ogrebel za kakav zalogaj tam v ofisu gde me gosti nisu mogli videti. No nije ni to bilo baš zabadaf. Tu i tam bi ih “podmitil” s kakvim pičem. Zapraf smo čez fanj let postali prava pajdašija.
Kaj je nudila koprivnička okolica bum nekaj napisal sledeči tjedan.
Kratko podsečanje na Velki tjedan
Kaj planiram kuhati za Velki tjedan? Mislim da bu uglavnom skromno osim naravno Velog petka i Vuzma. Uostalom ovaj je tjedan od navek pri nama doma isti ili skoro isti več desetlječima. Razlika je samo v tome kaj više nema nekih dragih pajdaši z kojima smo se desetlečima sastjali na Velki petek. No sečanja na njih ostaju.
Pondelek
Juha/Glavno jelo: Kisela juha od želučeki
Desert: Znate več: kolač od nedele
Tork
Juha: jedna Podravkina z vrečice
Glavno jelo: Musaka od kelja
Desert: Kompot
Sreda
Juha/Glavno jelo: Pileči paprikaš z domačim rezancima
Desert: Mazanica z vrhnjem
Četrtek
Juha/Glavno jelo: Prosena kaša z prženim lukom
Desert: Voče
Petek
Danas moram poštivati tradiciju obiteljskoga stola. Kak nas bu jedanajst z decom moram paziti da buju svi zadovoljni. Obed bu sigurno nekaj kasneše nego obično.
Predjelo: Namaz od graha z koščičnim uljem, bakalar na belo; tostani kruh
Juha: Juha od kozici i osliča z kašicom
Glavno jelo: File od soma/grgeča na pariški, krumpir na putru
Desert: Draganovečka graševina i po želji dece jogurt-torta
Subota
Juha/Glavno jelo/Desert: Skoro sam siguran da nebum ništ kuhal. Ili buju ostanjki od jučer ili nekakva „prazna“ testenina. Tak i tak imamo pripreme za sutra.
Nedela
Danas bu malo manjši familijarni krug i pak malo kasneši obed.
Kak samo Đuro i ja jutro sami bumo blagovali nekaj kasneše i to naravno jako tradicionalno i skromno:
Doručak oko devet vur:
Rakijica od marelice za aperitiv
Šunka, jajca, hren, rotkvice,mladi luk, cipof (fini podravski beli kruh)
Obed oko jedne vure:
Juha: Goveđa juha, leberknedli i sitni rezanci
Toplo predjelo: Kuhana junetina, hren sos, povrče z juhe
Glavno jelo: Pečena janjetina, mladi krumpir, šalata, mladi luk
Desert: Čaša vina, verojatno kardinal šnite, kapučino/kavaOd srca želim svim Coolinaričarima Sretan Vuzem!
:(Još nema komentara