A kaj da danas kuham? (567)

Opet Imbrin rođendan

Nakon dve lete pajdaš Imbra z moje generacije  je pak proslavil rođendan. Znam da se on nebi uvredil da otkrijem kolko je star al gospodi naših let nije više pristojno brojiti rođendane. Do ove nesretne pandemije letima smo se sastajali v njegvoj vikendici v Hudovljanima. Sastanak je “službeno” bil kakti  da imamo sastanak naše gimnazijske udruge  za pripremu nove knjige ali je v pozadini bil poziv na rođendan gde su se  našli i prijateli z posla, rođaci, pa je čak letima dolazil Zoltan jedan njegov poslovni partner z Mađarske.  Bila je to navek bogata gozba a bilo je i žive mužike, tzv “bend za rođendane i ak treba svadbe” u sastavu Joža gitara i vokal, Zoran harmonika i vokal a svi ostali su beglajtali kak prateči vokali. Jedno leto se odnekud našel i pravi pravcati doboš  pridružil sam se i ja pa smo postali trio “Veseli dečki” ali samo za jednokratnu upotrebu. Lokdaun nas je 2020. ni sprečil jer se dogodil dan-dva posle rođendana, prošlo smo leto preskočili slavlje i tak si je pajdaš Imbra morti prišparal jednu svečicu na torti. Kak je ovo leto  stožer malo popustil mere, nije više tak strogo zabranjeno okupljanje, privatno se moglo okupiti i dvadesetak ljudi, pak smo se našli na vrpi da pajdašu zaželimo puno zdravlja i još puno rođendani. Da nam malo prištedi puta i benzina, koj je baš ovih dana jako poskupel, ovaj smo se put našli v njegvome koprivničkome domu v Ledinskoj. I znate več. Priči i tema kolko ti srcu drago. Imalo se i kaj reči. Dok smo pretepli zdravstvenu situaciju v Lepoj Našoj, dok smo analizirali naše zadnje nalaze od kojekakvih specijalisti, popili po koji aperitiv, časkom dojde i vreme za blagovanje. Naravno da je bilo i kojekakvih poklona makar moram priznati da je Imbra kaj se tiče kojekakve pijače miram do sledečega rođendana. Nismo bili baš posebno kreativni. Joso je kak i navek  uspel zvleči z rukava jedan svoj osvrt na neka davna vremen v stihovima. Rado bi vam prepričal o čemu je sve pisal al verujte da sam zaboravil “kaj je pjesnik štel reči”. I da nebi bilo iznenađenja na vreme i z voljom  pojavil se i naš bend z novim repertoarom. Doduše Zoran se na časak požalil da mu je meh na harmoniki malo poplesnivil no to nije utjecalo na kvalitetu svirke. Bilo bi dobro da se morti tu i tam najdemo i v triu, uvežbamo i proširimo repertoar pa bi mogli i zaraditi koju kunu. V ovim teškim vremenima svaka kuna sa strane bi dobro došla. Morti bi bili atrakcija kak je to negda bil Mariška bend.

A  gastronomska ponuda? Pa niste valda pomislili da jedan ovakav rođendan more prejti bez bogatoga stola. Znate kak bi mi to v Podravini rekli: “Sega kak na Božić!” Još samo da je gladnih.

Nakon dve lete pak na vrpi. Tanjuri su prazni jer je baš završil obed.

Jan i njegova ekipa v akciji

Prošli vikend nas je vreme baš poslužilo. Več dost dugo planiram jednu akciju al sam furt odgađal za neko lepše vreme. Kak osvešteni ekolog svu razgradivu zelenjavu skupljam na jednome mestu i za gnojidbu gorici koristim samo komposta. V zadne dve lete se fajn toga nakupilo i bilo je vreme da to rešim, malo oplemenim zemlju i trsima dam malo prirodne hrane. Nije to bogznakakav posel al sigurno ni više za Đuru i mene. V pomoč je priskočila Janova  ekipa kojoj je takva akcija zapraf samo lagano razgibavanje uz dobru zafrkanciju. Njih petorica, Jan, Fran, Gari, Vedriš i Relja su za otprilike vuru vremena, z pauzom za gemišt,i razvozili po goricama komposta dok si rekel keks. Još su stigli zvaditi nekolko starih trsi koji su dali svoje i otpiliti višak granja na jednoj staroj jabuki kaj ja nebi uspel napraviti “dok je bor zeleni”. Moj je glavni dio posla bil pripremiti dovoljno alata i tački za celu ekipu. Naravno da sam moral dati i neke upute kak to obaviti jer su dečki tak nekaj delali prvi put. Sve skup je to trajalo oko tri vure z velikim pauzama. Verojatno vas zanima kaj sam im priredil za blagovanje? Tu je bil ovakav dogovor. Đuro i ja bumo napravili bogati gablec i dali piče a oni buju otišli pogledati nekakav lokalni derbi v Kunovec i onda došli roštiljat v svojem trošku. Kaj to ni dobar posel? Zašparaš na klopi, daš koju litru vina a težaki se sami počastiju z roštiljom. Kaj se tiče gableca pripremili smo: domači špek, domače suhe kobase, domače kuhane kobase jeger i sir a Đuro je spekla friške klipiče još doma. Z dečkima imam inače jedan “veliki problem”. Naime kaj. Kak su oni mladi i još neiskusni goričari jako šaraju v nabavi mineralne vode za gemišt. Ja sam doduše bivši Podravkaš al još sam navek jako veran “Studencu” a oni donesu tu  i tam  onu vodu koju v dučanu prvu vidiju. Nemrem ja pobeči od toga. Negda sam bil cimer z pajdašom Tončom dok se Studenac probijal na tržištu i kak sam znal razliku kvalitete tih gemištaških voda ostala mi navika i do dandanas. Lokalpatriotizam vam je važna stvar. Retko pijem pivu al dok pijem onda je to negda bil “Tuborg” a danas je “Pan”.

Josipovo je iza nas

Moram se malo osvrnuti i na Josipovo koje je bilo prošlu subotu. V svojoj knjigi “Ko to ne voli Podravce?” zapisal sam jednu priču pod naslovom “Lepo ime Josip”. Z više razloga. Deda po mami je bil Josip, v klapi je bil negda naš pokojni pajdaš Joško Gudić, dan danas je v klapi Josip Povrženić Joso, imal sam v Podravki cimera Joška Širića a negda sam si ofiral z jednom Josipom. Pa kaj to nije razlog da se setim toga sveca? Da malo ponovimo gradivo. Nemam vas  nameru podsečati na Bibliju nego samo na ono kaj je opčepoznato. Vele da je se taj svetec zove i Josip radnik a ono, kaj je najvažneše, Sv Josip je zaštitnik Lepe Naše. Nisam baš siguran da neki naši vrli političari znaju ko je bil taj svetec i kaj znači za našu domaju. Doduše oni puno toga neznaju kaj znamo mi obični smrtniki.

Josipovo nismo negda slavili baš na veliko al smo našega Jošku navek “zvezali” tam gde smo se taj dan našli. Moglo je to biti pri “Jurencu”, pri njemu doma al i v goricama pri Fjaki. Sečam se da je za taj dan znal imati navek za ponuditi sjajne kobase koje je delal njegov stari Štef, vrsni legendarni brežanski mesar. Domače žemlje je znala speči njegva mama Eva. Ta kombinacije domačih kobasi i žemlji se ni smela kvariti z nikakvim drugim dodatkima. Toga recepta za kobase od njegvoga jape ja se držim i dandanas.                             Mali podsetnik za vinogradare. Do Josipova je bilo krajnje vreme da se porežu gorice. To su nekakve stare goričke regule al kakva su danas čudna vremena vidim da su mnogi fletni goričari to več završili puno raneše. No znate da bu posla oko gorici celo leto sve tam negde do Martinja.

Moram vam se malo požaliti. Pred par dana me je pak napal giht nakon dužega vremena. Vele da je to gospodska bolest al se meni tak ne čini. Znal sam ja da je to velko zlo ak ste skloni ovim kolinskim zimskih delicija, filekima i kojoj čašici vina. Kak sam jedno vreme na to zaboravil pomislil sam je to iza mene. Malo brus. Ak ste to negda imali onda znate da to bbbooollliii! To znači da se bum ja moral ovaj tjedan malo patiti a vi me probajte slediti ak vam paše. Dok sam pogledal malo onu listu “zabranjeno konzumirati, dozvoljeno jemput tjedno i prihvatljivo”, skoro me je šlag trefil. Neka mesa nesmeš ni pogledati, iznutrice zaboravi, plavu ribu ni pomisliti, za alkohol je nastupila čista prohibicija. Čak je na listi zabrane i karfiol za kojega sam navek mislil da je najzdraveša povrčka na svetu. Kak bum dugo zdržal bum vas izvestil drugi tjedan ak preživim ovu torturu.

Pondelek

Juha: Kašena juha z nekakvim gljivama
Glavno jelo: “Kraljevski mix” na putru;nadam se da vam je poznato ka su to mešane povrčke.
Desert: Zemite  koju napolitanku

Tork

Juha/Glavno jelo: Čušpajz od kelja z malo mesa v tragovima
Desert: Kuruzna zlevanjka z dost vrhnja i pekmeza

Sreda

Danas dolazi na obed Jan pa moram malo popustiti z tim mizernim jelovnikom
Juha: Paradajzova juha z fritatama
Glavno jelo: Štefani pečenje, restan krumpir, šalata
Desert: Šnenokli

Četrtek

Juha/Glavno jelo: Povrtno-pileči ragu
Desert: Puding od vanilij

Petek

Juha: Juha od ribane mrkvice
Glavno jelo: Kuhana škarpina, blitva
Desert: Kompot od jabuki

Subota

Juha: Krumpirova juha
Glavno jelo: Špagete na putru z puno parmezana
Desert: Sok i samo sok

Nedela

Juha: Pileča juha z kašicom
Glavno jelo: Kuhana piletina, povrče na maslinovom ulju
Desert: Đuro bu pak spekla bugarku