A kaj da danaskuham? (499)

Počela je sezona kolinja

Kak klinac sam se kolinama više veselil nego drugim posebnim danima tokom leta. Bil je to navek dan dok se več od ranoga jutra počelo nekaj događati. Došel bi Franjo, naš glavni majstor mesar, došli bi pomagači a negda i moja baka Jela z Ivanca koja je bila zadužena za obiranje oporka i pranje creva. Društvo se najprije malo pospominjalo o nekim  muškim temama, popila bi se koja rakijica ili još bolje čaj z rakijom. Sledil je dogovor oko toga ko bu kaj delal i onda na posel. Kolko god sam se veselil tom poslu nigda nisam išel za velkim muškarcima da vidim onaj čin obaranja pajceka nego bi pričekal negde v kuhinji dok pajcek nebi bil več vu koritu. Od toga je momenta počelo moje budno pračenje kaj gospon Franjo dela jer sam nekak slutil da se bum jednoga dana i ja prijel takvoga posla. Od njega se fakat moglo puno toga nafčiti jer je tam negde krajem pedesetih v prelaznom roku  prešel z negda velike forme “Sljeme” vu Podravku. Bil je dugogodišnji poslovođa Podravkine kobasičarne i znal je sve tajne recepte suhomesnatih proizvoda.  Kaj je najvažneše pri nama je v zimskim mesecima znal i prespati, a kak je znal za moju “ljubav” prema tim proizvodima znalo se dogoditi da me počasti tu i tam z kakvom salamom, hrenovkom ili safaladom. Morti me sečanje malo i vara al mi se čini da su tadašnji suhomesnati proizvodi bili puno kvalitetneši pa se njihovog okusa dobro sečam i do danas. Nadam se da su današnji Podravkini majstori te recepte zadržali i do danas.

Nekak z moji odlaskom v Zagreb na studije gospon Franjo je otišel v penziju, još je koje leto bil naš kučni majstor a onda je trebalo poiskati naslednike i zadržati tradiciju kolinja v našoj hiži.

Mesari hobisti

Tam negde polovicom sedamdesetih na kolinsku scenu stupa jedan dvojac koj bu se z tim važnim poslom bavil prek četrdeset let. Moj prijatel Hus i ja smo se nekak v to vreme upoznali i brzo smo vidli da imamo sličan hobi i ljubav prema tom poslu. Ak se dobro sečam najprije smo se našli v ulogi asistenti majstoru Iveku na kolinama pri pajdašu Pepeku. Ivek je brzo svatil da smo mu od velke koristi pa se znalo dogoditi da on ode gledati na televiziji skijanje a mi smo završili onaj najvažneši posel oko delanja kobasi, čurki i prezvuršata, proizvoda kojima se svi najviše veseliju. Za leto dve smo zapraf prevzeli čitav taj posel, Hus kak glavni majstor i ja kak prvi asistent. Brzo smo vidli da nam to ide dobro i više ni bilo dileme: mi to znamo i delamo z voljom puno bolje nego nekoji preštimani mesari. Znate kaj se dogodilo? Ljudi su nas počeli zvati kakti glavne mesare pa se znalo dogoditi da čekaju naš slobodni termin a sezona nam je počela početkom studenoga i trajala do polovice sečnja. Svaki vikend smo spremali cekere z alatom i krenuli k novom gazdi. Verojatno se bute setili da je to vreme bilo jako v modi kupovati svinjske polovice prek sindikata. Negda se to pretvorilo v pravu masovku pa se znalo i preterivati. Kak sam imal velkoga podruma baš pravu prostoriju za tak nekaj udružili bi snage z prijateljima i rodbinom pa se znalo dogoditi da se po stolovima najde i do petnaestak polovici. Bilo je to grdo i za videti a kolko je to posla to znaju samo oni koji su takvoga posla delali ili barem malo pomagali. Dok bi delali tak nekaj nije bilo šanse da posel napravimo v jednom danu. Jedan dan obrada mesa i nadevanje kobasi a drugi dan ostali proizvodi. Bez lažne skromnosti mislim da smo delali jako dobro i ne sečam se da smo igda otišli od hiže a da je domačin bil nezadovoljan. Kome smo sve delali nemrem se ni setiti a naš se teren proširil od Koprivnice i na Prekodravlje a bili smo i česti gosti pri pajdašu Bobi vu Virovitici.

Tak su zgledali proizvodi kolina pri meni v kleti pred samo leto dana

Bilo je v tim našim pohodima kojekakvih anegdota kojih se rado setim. Tak je jemput jedna dama zapitala Husa:”Mladi gospon. Kaj treba za dobre kobase?” Odgovor je bil vrlo jednostavan i jasan:”Nebute gospođo verovali al treba pravo meso!” Jemput ga je pak  za vreme večere jedan poznati koprivnički doktor (?!) pital:”Od čega se zapraf delaju šnicli?” Čudno pitanje za jednoga doktora al je dobil pravi odgovor:”Ha čujte. Obično od krmenadli!” Stareši se buju setili da je negda bilo jako važno pofaliti se na kraju kolina z količinom kobasi i masti. To je bil znak da je to prava dobrostoječa hiža a bu se imalo i na čemu kuhati do sledečih kolini. Ulje negda baš i ni bilo na ceni. Jednom prilikom smo tak došli v jednu dobro stoječu familiju v Ivancu gde smo trebali napraviti samo proizvode. Po mogučnosti kaj više kobasi. Ponosna gazdarica nam je dala vrpu “mesa” od kojih je trebalo napraviti “puno dobrih kobasi”. Pita mene Hus: “Kaj da z tim delamo? Čuj Ivo. Nesmemo se mi sramotiti. Moramo to malo prebrati i napraviti kobase kak bog zapoveda”. Tak smo i napravili ali smo “šokirali” gazdaricu. Ni mogla dojti k sebi. Od tolkoga mesa samo tak malo kobasi? Mislim da se gazdrica toga leta ni baš falila pred susedama z puno pari kobasi.

Ak v ovim vremenima baš očete imati dobre dobase napravite to po sistemu “sam svoj majstor”. Kupite na akciji meso po sistenu: lopatica/vratina 70% i 30 % tvrdoga špeka. Zmeljite to  a od začina dodajte 2% soli, crvenu ljutu papriku po vašem ukusu i vodu od protisnutoga češnjaka. Ak dodate i usitnjenoga češnjaka imate odlične češnjovke. Nadenite ih v tanko crevo. Imate kobase i za peči i friške za kuhati. Ak imate mogučnosti da ih još malo podimite dobili bute odlične domače kobase i z njima bute jako zadovoljni.

Kaj bu z mojim kolinama ovo leto nemam pojma. Sve je još pod upitnikom. Nekakva rešenja imam ali sve to ipak zavisi o ovoj situaciji oko nas, o tome dal bum našel mesara i naravno  o tome kaj i z kim morem nekaj sam napraviti. Zima je duga i bum se nekak prilagodil i snašel. Teško je odustati od te duge tradicije. Sve ono kaj probam od kolinskih proizvoda koje v mesnicama zovu “domači” nimalo mi ne sliče na ono kaj smo delali doma tolka leta. Ak i najdem mesara moral bu delati pod mojom kontrolom i po našim receptima.

Kak su ovih dana več počeli jutarnji minusi mislim da moremo početi ze zimskim jelovnikima.

Pondelek

Juha/Glavno jelo:Kisela juha od pilečih  želučeki i srca. Ja tu svakak dodam malo mrkve i krumpira i dobro začinim.
Desert: Nekaj se bu več našlo

Tork

Juha: Kašena juha z vrganjima; ak nemate vrganje zemite jednu juhu z vrečice
Glavno jelo: Špagete ala francuski krumpir
Desert: Voče

Sreda

Juha/Glavno jelo:Pileči paprikaš z nekakvom testeninom; ja obično rabim fuže
Desert: Šnenokli

Četrtek

Juha/Glavno jelo: Sarma; sarma se dela za par dana. Ak napravite od kile mesa, dodate malo pisanoga špeka i koju kobasu imate obed bar za dva dana ali ju morete i zamrznuti. Znate več da je sarma bolša dok se pritopi nakon dva-tri dana.
Desert: Kuruzna zlevanjka

Petek

Juha/Glavno jelo: Zelje z mesom; najte slučajno deti v to zelje meso od šunke ili krmenadle. Ak morete pri mesaru dobiti najbolja su mesnata špicrebra, kočnica i mesnati rep. To je posel! Ak vam ostane višak zelja ostavite ga za jedan odličan grah zeljem.
Desert: Buftli z pekmezom.

Subota

Juha: Prežgana juha z jajcima i krutonima
Glavno jelo: Pečenice, restani krumpir, šalata od friškoga zelja
Desert: Znate i sami kaj bi vam tu moglo pasati

Nedela

Juha: Juha od svinjskih kostiju z leberknedlima; bute se iznenadili kak to more biti fina juha
Glavno jelo: Pohani krmenadli, pire, zelena šalata
Desert: Štrukli od jabuki