A kaj da danas kuham? (458)

Kaj me snašlo prošli tjedan?

Sigurno znate da Jan dolazi k nama na obed svake srede i petka. Negda sam negda z svojom deklom. Tak je bilo i prošle srede. Bila je peta veljača dok je pri nama v Koprivnici Spasovo. Naša banka nam naime na taj dan dostavi  penzije kaj večina penziča jedna dočeka. Lepo sam obavil svoj jutarnji ritual, skuhal obeda i dočekal ovo dvoje mladih na obed. Imam običaj posle obeda, dok nema Đure, oprati i suđe i onda krenuti malo na počinak. Lepo sam se spružil, otprl si svoju muziku i čital nekakvo lagano štivo. Koju minutu posle dogodil se jedam STRAŠAN TUTANJ! Imal sam osečaj kak da je na mene opala bomba. Za tri-četri sekunde se sve stišalo i onda pitanje:Kaj bi to moglo biti? Nije morti pri meni? Sigurno je to antena z onim satelitskim tanjurima koja me furt zabrinjava? Da je taj osečaj fakat jako neugodan moram vam reči da mi je dnevni boravak na mansardi i kaj god se događa na krohu čini vam se kaj da vam je točno iznad glave. Onda zmognem malo snage i pogledam čez jedan krovni prozor prema vulici i na krohu ne vidim ništ. Onda brzo krenem na drugi prozor prema dvorištu i imam kaj videti: hrpetina črepa, cigle, elementi od dimnjaka i naravno onaj oko dva metra dugi limeni dimnjak.To bi bilo daklem to. Spustim se v dvorište i imam kaj videti. Osim onoga na zemlji vidim i krš i lom na krohu. Lepa rupa na krohu, zvijani žljebnjaki puni črepa.

Ovak vam je zgledala ta „mala“ vrpa. To umnožite z dva dok je majstor nahital još one sve dodatke kaj su još bili na krohu.

Sreča v nesreči je bila kaj taj dimnjak ni opal na krovni oblok iznad kupaone. Sam taj oblok košta par hiljada kuna. Znate kaj mi je v tom trenutku palo na um: nebu valda opala još i kiša? Kaj prvo poduzeti? Počel sam nazivati meni poznate majstore i neke prijatele koji bi mogli poznati takve majstore. Tu sam fakat imal sreču. Od dimnjačara, koj je svojedobno montiral toga dimnjaka, dobil sam broj mobitela majstora za takve poslove i sve je išlo filmskom brzinom. Majstor je došel pred večer, snimil situaciju, dal procenu štete i obečal da bu sve sredil za dan-dva. Došel je i čovek z osiguranja, snimil sve i dal mi upute kaj delati. Drugi je dan majstor došel z jednim radnikom, dopelal materijala i za otprilike tri vure bil je kroh pak kaj novi. Čak sam drugi dan uspel najti i jednu dobru dušu da mi otpela svu onu šutu koju su veter i majstori ostavili. Sad naravno sledi papirometrija: platiti majstora, odnesti potvrdu o uplati na osiguranje i naravno čekati kaj se bu dogodilo. Dal mi buju platili i kolko to v ovom momentu niko nezna.  Nadam se da buju imali razumevanja za višu silu i za jednoga penziča. Bumo vidli rekli su slepci. Treba mi samo strpljenja.

Najavil sam prošli tjedan da ponovno pišem za naš Glas Podravine. Naravno na istu temu kak i na ovom blogu.  Dobil sam fakat puno prostora i moram tome pristupiti ozbiljno i profesionalno makar nisam profesionalac. Ima jedna razlika između Coolinarike i Glasa. Znate da ja skoro nigda na Coolinariki ne pišem recepte. Oni kaj čitaju moj blog uglavnom znaju kuhati al je onaj večiti problem:“A kaj da danas kuham?“ Iznimka je ak me baš neko moli da to napravim kak je to bilo nedavno z prežganom juhom. V Glasu pak prema dogovoru trebam osim priče i jelovnika  dati i nekakvoga recepta. Nebu mi ni to preveč teško. Ak ništ drugo navek morem napisati nekakvu svoju improvizaciju jer zapraf ja v kuhinji navek i improviziram. Ko bi furt listal po kuharicama ili surfal po internetu.

Dok ovo pišem dobil sam vest da je umrl moj dobar pajdaš, veliki Podravkaš Rudi. Dosta je stareši od mene al smo se jedno vreme v Podravki lepo družili. Osim toga bil je i muzikant. Pripadal je generaciji gimnazijalci koja je imala bend za vreme školovanja. V svojoj knjigi „Zvjezdana prašina“ del sam i sliku njihovog orkestra. Retko se dogodi da celi orkestar od sedam ljudi bude z iste generacije. Letima posle toga sam i ja sviral z nekima od njih.

No z Rudijem ima jedna anegdota vezana z hranom. Podravka je svojedobno delala jednu brošuru gde je trebalo predstaviti glavne Podravkine proizvode. Kak sam ja navek pripovedal o hrani predložili su mi autori brošure da se slikam za naš gulaš. Jer kao ja imam „sladostrasnu facu“ i dobro bu pasala ako se slikam z onom limenkom gulaša na kojoj je valda i danas kravica. Odbil sam tu „primamljivu ponudu“ jer sam mislil da si kakti  jedan psiholog i poznati bubnjar nemre dozvoliti da se slika z kravicom.Kaj si buju mislile moje „obožavateljice“? Potražili su drugo rešenje v osobi pajdaša Rudija. Zamena je bila više nego uspešna. Rudi je moje visine, moje širine i navek je pokazival veliku ljubav prema papici. Najte ni sumljati da je i slika i brošura uspela iznad očekivanja.

Pondelek

Juha: Prežgana juha na moj način. Naravno da bum zakuhal sitnu kašicu
Glavno jelo: Pržene srdelice, krumpir šalata; ne mora riba biti samo v petek. Ovo je zaželela Đuro
Desert: Znate da ima kolača od jučer

Tork

Juha: Jedna Podravkina z vrečice
Glavno jelo: Rižoto od svinjske lopatice, šalata
Desert: Kompot od breskvi

Sreda

Jan mi je najavil da dolazi pak z prijateljom Franom. Ja sam za nas dvojicu planiral za danas ovo
Juha/Glavno jelo: Fileki na kiselo, kaj če reči na gulaš. E sad. Ako Fran baš ne luduje za filekima bum mu na brzinu pripremil nekaj drugo.
Desert: Đuro je obečala dečkima napraviti nekakav kolač.

Četrtek

Juha: Juha z vodom od domačih kuhanih rezanci;ja denem v tu juhu goveđu kocku, malo slatke i ljute paprike i naravno dost kiseloga vrhnja. Zakuham kaj imam pri ruki.
Glavno jelo: Musaka od domačih rezanci
Desert: Nekakav sok 

Petek

Kak se je moja sestrična dokazala kak pravi majstor za kiselu repu zamolil sam ju da to pak napravi ali malo vekšu lončinu.
Juha/Glavno jelo: Čušpajz  z kiselom repom; za dodatke smo se dogovorili ovak: ona bu dodala junetinu a moj je prilog vu vidu jedne friško osušene svinjske kračice. To bu obed čak za tri familije. Ak slučajno ostane bum posle toga v to uvalil šačicu graha.
Desert: Verojatno kuruzna zlevanjka ili morti palačinke.

Subota

Juha/Glavno jelo: Vinski gulaš; bum ga delal malo „nježnijega“ nego v goricama i dodal bum dva zrna krumpira
Desert: Nemam pojma. Nekaj se bu več našlo.

Nedela

Juha: Juha od pilečega sitniša
Glavno jelo: Pečeni picek filan z jetrenim nadjevom, pečeni krumpir, zelena šalata; za nadjev kupim koja jetrica viška a osim kruha dodam i falačec skosanoga špeka.
Desert: Šaumrole, kapučino