A kaj da danas kuham? (623)

Muzikanti kak gurmani (1)

(Od kolači i malinovca do restorana z pet zvezdica)  Dok su se plesnjaki održavali u nekojem vekšem razredu na našoj školi sviralo se na tzv čajankama v nedelu rano  popodne. Morti mislite da je to bilo kak pri Englezima “fajf o klok ti” ali ste se prevarili. Sve je to zgledalo ovak: domači malinovec z običnom vodom i domači kolači koje su spekle  naše drage mame. To srečom ni dugo trajalo jer smo prešli svirat vu vekše dvorane na plesnjake na kojima ni bilo ničega osim muzike i plesa. I sad ti budi gurman a nema ni malinovca ni kolači. Onda se počelo svirati i na plesnjakima v novoj Ekonomskoj školi gde ste mogli pojesti sendvič z parizerom. Sve v svemu jako skromna ili nikakva ponuda. Onda su se dogodili dočeki novoga leta. E tu vam moram spripovedati jednu istinitu anegdotu. Jedan naš klavijaturista je fakat volil puno papati a jel je sve od reda. Sviramo mi doček na novo leto v koprivničkom “Domoljubu”. Ni bila baš bogznakakva ponuda osim standardnih kobasi i hrenovki senfom i prasetina z lukom. I tak pod pauzom pojedemo nas trojica po par kranjskih z dva kruha i krenemo prema pozornici. Kad evo ti basiste z malim zakašnjenjem. I znate kaj se dogodilo. Ovaj naš z apetitom se pak vrne i mazne još jedan par. Neznam kak vama al meni je to zgledalo malo preveč: dva para kranjskih, četri kruha za samo dvajst minut.

Na prvoj letnoj gaži smo imali sreču. Nekim čudom tu terasicu v Opatiji su držali  dvojica poznatih ugostitelja: Anđelo i Đuka. Jedno vreme su delali na Brijunima a Đuka je plovil i z Titekom na “Galebu”. Nemrem baš reči da je to bilo nekaj preveč gurmanski al je svakak bila puno bolša kuhinja nego v našem “Kalniku”. Anđelo je imal relativno skromni jelovnik ali z malo vekšim porcijama i čak jako dobar roštilj. Onda nam se dogodi kak studentima opatijski hotel “Jadran” gde smo imali tzv “personalnu hranu” koja nije bila bogznakaj ali smo mi to nadoknađivali z vlastitoga žepa. Barem dvaput tjedno smo se odšetali na Volosko do “Plavoga podruma”. Odličan riblji restoran gde smo naravno mogli jesti samo ala carte. Nisi mogel naručiti čušpajz grah v ribljem restoranu. Navek friška riba ali kak mali “žabari” uglavnom smo jeli file od osliča na pariški, pomfrit i šalatu. Na to je navek pasala istarska malvazija. Toga leta imam jednu zgodnu anegdotu z našim gitaristom. V hotelu smo večerali na terasi ispod zelenila. Naš vam je gitarista kak student jel isključivo v studentskoj menzi ali je v hotelu prigovaral svemu. I tak jemput za vreme večere prigovara na kvalitetu telečega paprikaša kad ono sred jela mu se na tanjur, da prostite, uneredil jedan bezobrazni golub. Trebali ste videti njegvu facu i čuti naš zločesti smeh.                                                                                                                                                      

Na kraju leta smo Braco, Cico i ja otišli na gažu v Crikvenicu još mesec dana v hotel „International“ i tu nas je fakat poslužila sreča. Kuharica je bila jedna naša draga Međimurka koja nas je fakat razmazila. Bilo joj je drago da se more malo pospominjati na svojoj kajkavštini pa je navek znala kaj bi mi rado pojeli mimo onoga hotelskoga sterilnoga jelovnika.

*Sl: Ovu „Raffaello roche“ tortu je Đuro spekla za rođendannaše  vnuke Viktorije

Dve letnje gaže na Lošinju su prešle v znaku toplo-zdeno.Jako smo ovisili o dobrom raspoloženju našega glavnog kuhara Jose. Za četri meseca gaže bilo je i kojekakvih čarki a stvar je rešil “Stari graničar”.To vam je bilo jedno prestrašno piče, srečom ga više nema, a obožaval ga je naš Joso. Posle jednoga fajrunta, donesel je dve flaše toga huncuta i maltretiral neke članove benda dok flaše nisu bile prazne. Kvaliteta hrane se naglo pobolšala. Ja sam imal i drugu varijantu. Dok sam popodne ogladnil navrnul sam do kuhinje jer sam znal da je pripremu za večeru delala jedna draga teta Aliče. Navek je imala za mene nekakav zalogaj prije večere a usput me je nafčila i po koju talijansku reč.                                                                                                                                              

Kaj se tiče gurmanluka to smo leto v Lošinju jako profitirali z  talijanskom kuhinjom. Svojedobno sam napisal kak je nekim čudom vlasnik “Karoline” bil Talijan Angelino koj je dovodil na godišnji isključivo svoje prijatele Talijane. Naravno da Joso ni mogel kuhati navek posebno za fine goste a posebno za muzikante. Tak smo i mi tu i tam mogli omasitit brk z nekakvom finom ribom. Ni krivi ni dužni za jednu smo večeru dobili ogromnu škarpinu z podlogom od francuske šalate. Neki gosti su otkazali večeru a riba je več bila pripremljena. I kaj sad? Da se ne hiti  to bu večera za muzikante. Fala ti Joso. Jemput se pak dogodilo, bil je nekakav talijanski svetek, da smo za obed dobili obed z nekolko gangova testenine. Ruku na srce: kaj je preveč je preveč. E da. Nafčili smo parmezana posipavati na sva moguča jela; sve testenine, rižota, neke juhe pa čak i na čušpajze.

Nastavak sledi drugi tjedan.

Pondelek

Juha/Glavno jelo: Povrtno pileči radu
 Desert: Kifli se ne peču za samo za nedelu

Tork

Juha/Glavno jelo: Musaka od kelja
Desert: Palačinke z pekmezom

Sreda

Juha/Glavno jelo: Krmeči paprikaš z fužima; šalata ak vam paše
Desert: Vočna šalata

Četrtek

Juha/Glavno jelo: Sarma z pireom
Desert: Pogačice sirom

Ovo moram malo pojasniti. Kak ima još dosta kiseloga zelja, Đuro je predložila da napravimo više sarme pa imamo za danas a nekaj zamrznemo pa moremo frišku sarmu pojesti i sred leta.

Petek

Juha/Glavno jelo: Fišpaprikaš z domačim rezancima.
Desert: Naravno da tu paše dobar gemišt. Ili morti dva?

Subota v Draganovcu

Praznik rada je tek v pondelek ali mi penziči bumo to obilježili danas. Za razliku od ekipe prošli vikend ovo je veteranska ekipa koja se drukčeše organizira. Tu vlada onak baš timski rad: imamo ženske i muške obaveze. Žene se dogovore a mi realiziramo. Konačno najavljuju i lepo vreme.

Aperitiv: Od svega pomalo: od višnjevca do fine domače rakijice
Predjelo: Namazi, pašteta, malo nareski, klipiči i pogačice od kolko-tolko testa
Glavno jelo: Najverojatnije bogati mešani roštilj kojega bu pekla Jelena jer više nemamo muškoga roštilj-majstora; odustali smo od tradicionalne janjetine jer se društvo smanjilo pa nam je celo janje preveč.
Desert: Naravno gemišt, kolači naših ženica i kava ako nekome baš paše

Nedela

Juha: Goveđa juha z grisknedlima
Glavno jelo: Kuhana junetina, češnjak sos, pire od povrča
Desert: Kifli od lisnatoga z orehima