I tak z leta v leto imamo interesantne priče znanih i neznanih o tome čega se buju ili nebuju odrekli v korizmi. Čini mi se da bi od kak je interneta mogli napraviti copi paste tih izjava i nebi puno pogrešili. Za čitatelje kojekakvih medija to pak more biti tema za podsečanje na to kaj je korizma i koja su pravila za “vernike i one koji tek to očeju postati”. Naravno da ni ja nisam mogel odoleti napasti da nekaj ne prečitam i da se malo zabavim.
Čega se odreči?
Negda v ranoj mladost ja sam, i ne misleči na korizmu, nekolko put posle napornoga vikenda pred mojom klapom znal izjaviti da “od pondelka krečem v novi život”. Brzo mi se to obilo v glavu. Kak su naporni vikendi zaredali nikak da krenem novim putem pa mi je jedno vreme ostal nadimak “novi život”.Kak je to dugo trajalo teško mi je reč al da novi život traje več jedno duže vreme, i bez ikakvih korizmenih odricanja, to znaju svi oni koji su tu negde mojih leta al i oni puno mlajši. Odrekli smo se čist spontano puno toga jer nam je pogled na krsni list ili nekakav razgovor z obiteljskim doktorom odredil “novi život”.
Sečam se jednog mojega starešega prijatela velikoga gurmana kojemu se malo povisil cukor, doktor mu dal poveču listu kaj mora imati na jelovniku i žena mu se strogo toga pridržavala. I sad je bila frka. Kak je bil i poslovni čovek i lovac imal je sako malo priliku pojesti kakav dobar zalogaj. Veli on meni:”Čuj. Ja to nebum dugo zdržal.Nisam ja zec da furt jedem one trave kaj mi žena skuha. Kroz tjedan se bum držal reda al v subotu idem v lov i kak da prepustim onoga milnoga paprikaša. Bar jemput tjedno moram nekaj pošteno pojesti”. Kak je dugo zdržal neznam al se nadam da je v dobrom zdravlju.
Ruku na srce, četrdeset dana korizme baš i ni tak malo. Morate biti fakat pravi karakter da recimo odlučite malo češče preskočiti kakav fini falačec mesa ili posle dobroga obeda ne popijete čašu vina. Kak imam videti v tom pogledu su popustili i crkveni oci a i doktori. Tak vernici mlajši od osamnajst i oni prek šezdet let više ne moraju postiti osim ak to nije njihova dobra volja. Iznimka su radnici koji delaju teže fizičke poslove i trudnice. Morete zamisliti radnika, recimo u građevini, da je cel dan samo na kruhu i vodi? Pitam se kaj je z ljudima kaj imaju ono baš kronične zdravstvene tegobe? Za njih moramo imati razumevanja obzirom da su več i po prirodi betega uskračeni koječega. Sečam se da su doktori i sami znali preporučiti kakav jači zalogaj pa i čašicu vina, rakijice pa čak i dobroga konjaka. Morti se bute setili da se baš ženama preporučuje štamprl dobre rakijice dnevno. Verojatno znate i zakaj?
Ovih sam dana naišel na neke ankete o odricanju. Tak je neki Pero rekel, onak v šali, da se bu odrekel posla. E sad znam da se Pero verojatno šalil al priznajte da dobro zvuči. Morti on niti nema posla pa mu to nebu baš tak teško. Onda sam naišel na nekolko standardnih odricanja od cigareta, kave, slatkoga, mesa ili alkohola. No večina je pak rekla ono kaj mi se čini najpametneše: “Nebum se odrekla/odrekel ničega!” Jedna je pak ozbiljna dama rekla:”Ma kakvo odricanje. Odričemo se stalno!” Ima ona i praf. Sečam se jedne svoje kolegice koja se v korizmi odrekla cukora. Onda bi v kavu zasipala malo nekakvoga sladila a v žaru posla bi posegnula za kesicom cukora i to pojela onak usput. Ili jedna moja učenica, onak malo izraženih oblina, posle obilnoga obeda od predjela do deserta, iskala bi za kapučini diekala. To je posel. Imam takvih primera kolko vam srcu drago.
Tzv “kuruzna zlevanka specijal”.
A kaj je z menom?
Ja se ne odričem takaj ničega makar sam se nekih stvari moral odreči. Zapraf sam se ja za navek “odrekel” nekih stvari koje drugi obožavaju. Ne konzumoiram: “debelu testeninu” svih mogučih fela: knedle, njoke, debele rezance, šiškerle, taškerle i slične delicije.
Odričem se čokolade.Nebum ju ni pogledal. Čak ni v kolačima. Znam da bu neko pomislil da sam čudak al to je tak. Ni kak dete nisam nigda posebno poželel čokoladu. Dok jedem zagrebačke šnite preljev od čokolade dam Đuri. Jedem svakakvo voče al se odričem kokosa i ananasa. Velka mi je frka ak dojdemo nekam v goste a ponosna domačica ponudi baš takve kolačiče z kokosom.V takvim slučajevima opreza radi kolača preskačem. Oprez je majka mudrosti. Ak je pak servirana vočna šalata z ananasom to zbiram i pak to završi kod Đure.
Dobra je stvar v korizmi kaj postoji post i nemrs. Post predviđa suzdržavanje od obilnoga jela i piča, posebno od nekakvih krmečih delicija. Probajte zamisliti nekojega Podravca ili Slavonca da tolko vremena zdrži bez mesa. Nebu išlo. Nemrs pak predviđa samo konzumiranje jela bez mesa.Tu bi se još čovek snašel z povrčem i ribom i naravno mlečnim proizvodima.
Ima jedna istinita anegdota o moja dva stareša pajdaša. Zarekli su se da v korizmi nebuju v Koprivnici okusili ni kapi alkohola. Kad za par dana ih sretnem a oni natočeni do kraja. Kaj niste zdržali?
Jesmo al nisi dobro zapamtil. Rekli smo da nebumo okusili ni kapi v Koprivnici. Danas smo otišli z vlakom v Mađarsku, okrepili se i vrnuli se v Koprivnicu. Reč smo održali. Bravo dečki. To je karakter. I sad ti budi pametan i napravi tjedni jelovnika bez mrsa. Bum pokušal tek tolko da testiram svoje stare navike. Tjedan dana bum zdržal. A vi?
Pondelek
Juha: Bela juha
Glavno jelo: Domači rezanci z makom
Desert: Znate več: kolači od jučer
Tork
Juha: Prežgana juha
Glavno jelo: Slani štrukli sirom
Desert: Sok
Sreda
Juha/Glavno jelo: Pržene srdelice, krumpir šalata
Desert: Lagani gemišt
Znam da je danas Dan žena al muškarcima danas prepuštam da naprave nekaj lepo za svoje bolše polovice.
Četrtek
Juha/Glavno jelo: Špinat, pohani kruh, jajca na oko
Desert:Velika čaša vode z pipe
Petek
Predjelo: Riblja pašteta od jedne konzerve na tostu
Glavno jelo: Krem juha od graha z makaronima
Desert: Sok
Subota
Juha/Glavno jelo: Lepinjice iliti languši
Desert: Kiselo mleko/jogurt
Nedela
Danas nek bu iznimka
Juha: Lagana pileča juha
Glavno jelo: Pileči file z povrčem
Desert: Tzv “kuruzna zlevaka specijal”; ako je neko zainteresiran morem posleti i recepta.
:(Još nema komentara