Ovaj mesec imamo dva važna dana ak razmišljamo kak kulinari: Valentinovo je prilika za jedna fini malo svetešniji obed a Fašnik je pak tu za nekaj tradicionalno. Na sve strane čujem pripreme i za jedno i drugo, ljudi se v ovim teškim vremenima okreču kolko-tolko jednoj opuštenijoj atmosferi, malo se treba opustiti kočnice i dati si srcu oduška. Nekolko reči o Valentinovu a Fašnik nek malo pričeka.
Valentinovo
Zakaj slavimo Valentinovo je poznata stara priča a kak i puno starih priča je vezano uz svečenike. Tu priču o „neposlušnom svečeniku“ koj je išel kontra cara Klaudija i venčal vojnike pred odlazak v rat, smo čuli več bezbroj put pa ju netreba više ponavljati. Činjenica je da je taj njegov čin ostal zabilježen za budučnost i eto zadržal se do dana današnjega. A ko je od toga profitiral? To je svima jasno osim morti zaljubljenima. Tome svetku se ipak najviše vesele trgovci i ugostitelju. To je več par leta za ove mlade hrvatske države veča žetva nego je to negda bil Dan žena. Trže se na veliko kojekakvi pokloni a bome i cvečari znaju da je to pravo vreme za poboljšanje financijske situacije. O ugostiteljima da i ne govorim. Malo je nezgodno kaj Valentinovo pada v tork al se naši ljudi buju več nekak snašli. Radno vreme se navek more malo skratiti za jedan bogati obed a nije loše rešenje niti jedna fina večera.
Nadam se da bute našli pravo rešenje za taj dan i da se bute malo opustili.
Onaj prošlotjedni Jelenik jelovnik more vam biti kakti ideja za jedan malo bolši obed. Ak pak nemate vremena odite na jedan fini obiteljski/bračni obed ili večeru. Ovih sam dana več čule neke pozive koprivničkih restorana na intimni obed. Doduše ne oglašavaju kolka je cena za taj svečaniji obed al jemput na leto čovek more malo reskirati za svoju bolšu polovicu.
Da malo stvar obrnem z gastronomije. Iskal sam i našel zgodnu rečenicu v jednom tekstu, koj daje upute horoskopskim znakovima kaj napraviti taj dan. Evo kaj stoji za Strelca, moj horoskopski znak:
“Ako čekate da nekome kažete da ste zaljubljeni, pravi trenutak je Valentinovo!”
E sad. Lepa je to poruka za one koji su stari recimo dvajst let. A kaj ako imate tu negde skoro osam banki i ohoho bračnoga staža? Leta nisu važna i lepa reč se more navek uputiti dragoj osobi. Sigurno ste tu rečenicu izrekli dok ste si još ofirali sad se samo podsetite kak je to zgledalo. Poiščite svoj horoskopski znak morti i za vas ima nekaj lepo i poučno. Da vam malo pomognem. Ima jedna prelepa popevka od Kemala Montena koja bi mogla lepo pasati za taj dan. Ovo je samo jedna kitica:
„Napiši jednu ljubavnu
Nek nešto novo bude
Samo da nema suza
Na to smo navikli ljude...“
Pronajdite na internetu celu popevku nebu vam žal. Ja sam našel još nekolko Keminih prelepih popevki na koje sam več skoro i zaboravil. Rado sam si poslušal „Dušo moja“, „Žute dunje“ i još kojekakve lepe ljubavne balade. Dok to čujete nekak me mam vrne v ona moja glazbena vremena. A da nekaj iskreno priznam. Na takve lepe ljubavne popevke sam nekaj novci podelil muzikantima. Volili su me kak gosta.
Ono kaj svakak mora biti v jelovniku za Valentinovo je nekakav fini kolač. Kaj bu točno Đuro zmislila na Valentinovo nisam još saznal al znam kaj smo imali za desert ovih dana. Bil je to jedan jako bogati kolač, jako običnog imena: pita sa sirom i orahima. Neobično je pak to kaj je testo napravljeno od bezglutenskoga brašna.
Đurina pita od sira i orehi
Ako se odlučite delati nekaj doma a nemate pravu ideju bum vam malo pomoge. Ima jedna Podravkina knjiga pod naslovom „Slatka fantazija“ još tam z davnog 1999-toga leta. Autorice su bile Ivanka Biluš, velika poznavateljica gastronomije, Božica Brkan koja i danas piše o hrvatskim jelima i Eleonora Rekeće koja je pružila stručnu pomoć. Opče je poznata stvar da se ja ne upuščam v pripremu slatkoga ali znam ovu knjigu mnoge ženice čuvaju kak „bibliju za slastice“.Tu morete najti sve kaj vam srce poželi z receptima i jako vernim slikama kolača. Posebna je vrednost da je mam na početku „Mali slastičarski leksikon“ v koje morete saznati najvažneše informacije o potrebnim namirnicima za ispeči odličan kolač. Svi ovi prelepi recepti su lepo poslagani pregledno po ovim grupama slastica:
- Pudinzi
- Kreme
- Deserti s mirisom nostalgije
- Deserti od jogirta i sira
- Deserti s voćem
- Torte
- Kolači
- Kolačići
- Sladoledi, sorbeti i bole
I još nekaj. Sve to morete napraviti uz pomoč „Dolcele“ koja je „drugo ime za slatki dodir fantazije“. Znam da se tu teško odlučiti a za tak nekaj treba malo više volje i vremena. Več se bu nekom drugom prilikom našla i dobra volja i dosta vremena.
Pondelek
Juha: Povrtna juha
Glavno jelo: Zapečene palačinke sirom
Desert: Voče
Tork/Valentinovo
Želim vam svima da se dobro zabavite i taj dan posvetite svojim dragim i bliskima. Ja sigurno nebum v nekom restoranu pa bum za nas dvoje napravil ovak nekaj
Aperitiv: Štamprl rakijice od ruža
Juha: Lagana pileča juha z grisknedlima
Glavno jelo: Lungič v saftu od povrča, kroketi od krumpira, zelena šalata
Desert: Princes krafli; to naravno napravila Đuro; čaša muškata
Sreda
Juha/Glavno jelo: Sekeli gulaš; dodajte malo slanoga krumpira
Desert: Štrukli od jabuki
Četrtek
Juha: Kobasičja juha z kašicom
Glavno jelo: Francuski krumpir, turšija
Desert: Puding od vanilije
Petek
Juha: Juha od osliča i rižom
Glavno jelo: Oslič na pariški, mešana lešada
Desert: Čaša vina
Subota
Juha:Bela juha
Glavno jelo: Domači rezanci z makom
Desert: Sok
Nedela
Juha: Juha od goveđih kostiju z leberknedlima
Glavno jelo: Pohani krmenadli, pire, šalata od friškoga zelja
Desert: Žuta mađarica
:(Još nema komentara