Tema je stara kolko je staro i čovečenstvo i furt se ponavlja al nikak da ju dokraja prihvatimo. I tak generacijama. Naravno da ni ja z ovim tekstom nebum napravil revoluciju i nekaj drastično promenil al oko mene imam baš tolko friških primera „kreativnosti“ na temu „Ja bi predložil/napravil ovak nekaj“ pa ju teško morem preskočiti. Doduše na tu sam temu pisal pred nekolko let a naravno da ja v prvom redu mislim na neke teme z gastronomije a tu imam jako dobre primere baš z mojim bližnjima koje i najbolje poznam. A kak je danas demokracija moram uvažavati svako mišljenje o tome “To je jako fino“ ili ono „Kak ti to moreš jesti?“
“Kreativni“ Atač
(Kolko ljudi tolko čudi!)
S kim bum počel ak ne z mojim starim pajdašom Atačem. On je v kulinarstvu došel do kuhanja hrenovki i eventualno zna skuhati juhu z vrečice. No zato je jako „kreativan“ svaki put dok se treba najti naša klapa na redovitim godišnjim okupljanjima ili na našim vinskim svecima. Onda vam to otprilike ovak zgleda:
„Čuj stari. Nemoj se mučiti z kuhanjem. Imam predlog kaj da napraviš ovaj put!“
„Slušam te pažljivo“.
„Napravi ovaj put one male sendviče. Kak se ono zovu?“
„Kanapei“.
„E to. Napravi desetak kanapea z paštetom tak da moremo popiti gemišt.“
I kaj da mu čovek veli. Zamislite da se za vikend najde desetak ozbiljnih ljudi starih goričara i ponudite im nekolko kanapea. To bi bila prava gozba.
Javi se on prošle jeseni pred Martinje i veli:
„Čuj stari. Mi bi mogli ovo leto malo promeniti jelovnik za Martinje.“
„Kaj predlažeš?“
„Pa mislim da bi mogli naručiti ketering. Recimo svakome porcija srdelica!“
Nisam mogel dojti k sebi od šoka.
„Znaš ti Atač kaj za Martinje imamo na jelovniku več više od pedeset let? Tradicija nalaže da bu to guska.“
„ A gde buš nabavil gusku?“
Zamislite on se nakon jedva pedeset let zabrinul „gde bumo nabavili gusku?“
Mislite da je to sve? Ni govora. Evo ga ovo leto pred Vincekovo.
„Baš gledam na televiziji jednu emisiju o gastronomiji i razmišljam o jelovniku za Vincekovo.“
„Slušam te pažljivo.“
„Kaj misliš o okruglicima od grdobine?“
Prosil sam ga da mi to ponovi al sam očito dobro čul:“okruglice od grdobine“. V celom Jadranu se tokom leta vlove tri grdobine a on bi sred Podravine v kleti za Vincekovo ponudil „okruglice od grdobine. “ Naravno da sam pristal na promenu jelovnika al pod uvjetom da zapiše recept z televizije i časkom skoči na Dolac kupiti jednu povekšu grdobinu. Stvarno ne vidim razloga da v Draganovcu nakon pedesetak let konačno ne promenimo jelovnik.
Onda me jedno večer nazove baš vu vreme dok je Đuro pripremala lepinjice za večeru. „Bok stari. Kaj delaš?
„Evo gledam kak Đuro peče lepinjice za večeru.“
„Joj kak je to fino. Čuj to bi mogli jemput napraviti v goricama.“
„Kak to miliš? Ko bi to napravil?“
„Pa Seka/Đuro bi doma napravila smesu a mi bi to pekli v goricama.“
„Ko je to mi?
„Pa ti buš pekel!“
„A kaj buš ti delal?“
„Ja bum kontroliral kak to delaš.“
Bravo! Tak se to dela. Takvih koji bi samo kontrolirali imamo za izvoz. Sve v svemu ti naši razgovori završavaju na tome da ja skuham v goricama nekaj tradicionalno a Atač se nek i dalje bavi slikarstvom i drugim stvarima gde je fakat više nego kreativan.
Kreativna Jelena
Kak morete videti ovde nisam napisal „kreativna Jelena“ jer je ona fakat kreativna. Profesor je engleskog i njemačkog jezika al joj je kuhača velika ljubav. Za neka obiteljska okupljanja si zna dati mašti na volju i navek zmisli nekaj novo kaj nemamo prilike papati svaki dan. Malo je samo „čudna“ kaj se tiče kuhanja i konzumiranja juha. Za nju je dobra juha „glavno jelo“ pa navek mesto juhe obično ponudi nekakvo atraktivno predjelo. Da bi nekak izbegla prigovore kaj se tiče juhe nedavno je na jednoj akciji (luda je za akcijama) kupila jedan „čudesan uređaj“ koji služi za kuhanje juha?! Recimo neko si v goricama naglo zaželi pojesti dobru juhu i hop, več je juha na stolu. Doduše još si niko nije zaželel pojesti juhu al nismo još ni otkrili kak se taj uređaj zapraf koristi. Sve v svemu još je „nevin“ i čeka svoj red da pokaže kak je to dobro uložena lova v jedan „revolucionaran uređaj“.
No nekaj joj moram priznati. Njezina francuska juha od luka ze šnitom tostanoga kruha je baš zasitno „glavno jelo“. Posle te juhe fakat ne razlišljaš o pohanome šniclu. To mam išče čašu vina.
Nemrem odoleti da vam ne zapišem jedan njezim obed pred otprilike mesec dana. Malo je egzotičan i neobičan ali vredan pažnje. Da nekaj ne pogrešim bum vam to prenesel onak kak sam od nje dobil:
Prvo predjelo: Pečena kabocha s umakom na bazi rajčice, lješnjaka i garam masale
Drugo predjelo: Namaz od bakalara
Predjelo
Piče iza predjela: Pjenušac od muškata
Glavno jelo: Govedina na burgundski način (beef bourguignon); francuski goveđi gulaš pirjan u crvenom vinu, aromatiziran mrkvom, lukom, češnjakom, majčinom dušicom, lovorom, peršunom (bouquet garni) i ukrašen ljutikom i šampinjonima.
Domaći kruh od buče i raži. (*Ovo moram posebno istaknuti. Peče i inače kojekakve kruhove, meša pomalo neobične sastojke ali je svaki njezim kruh zapraf desert)
Govedina na burdundski nain
Desert: Kremšnite, mladi ovčji sir, sitni kolačići; (bezglutenske rolice od maka, vanilin kiflice, kuglice od cimeta i badema); popili smo i čašu crnoga vina a bil je poslužen i espreso z kučnoga aparata.
Tak je zgledal desert.
I kaj da vam veli? Bilo je fakat sve jako fino iako nisam baš sve razmel i znal prečitati. E sad me samo nekaj muči. Kolko treba vremena da se pripremi ovakav obed z nekolko sledova? Ja sam ipak praktičniji. Obed z više sledova delam samo za velke svetke ili obletnice. Nisam baš više v kondiciji da stojim pri peči celo dopodne. Puno je lakše skuhati dobru goveđu juhu, kuhano meso dodati pire i paradajz-sos.
Pondelek
Juha/Glavno jelo: Pileče-povrtni ragu
Desert: Naravno da ima bregovske pite od nedele
Tork
Juha/Glavno jelo: Čušpajz od poriluka z faširancima
Desert: Puding
Sreda
Juha: Juha od bočinga z kašicom
Glavno jelo: Kuhani bočing, pire, sosparadajz
Desert: Kompot od kruški
Četrtek
Juha/Glavno jelo: Sarma; naravno da bum zvadil jedan paket z škrinje
Desert: Pogačice od sira
Petek
Juha/Glavno jelo: Čušpajz grah ze suhim mesom
Desert: Gemišt
Subota
Juha: Bela juha
Glavno jelo: Rezanci z makom
Desert: Sok
Nedela
Dobili smo od prijateli jednoga pevca od tri kile. Bum ga ovak skoristil
Juha: Juha od pevčevog sitniša z leberknedlima i rezancima
Glavno jelo: Dio mesa (bocka, popar, dio filea) bum podinstal z gljivama, za prilog budu luleki od kolko-tolko testa, zelena šalata; ostatak bum složil drugom prilikom
Desert:Buftli z pekmezom
:(Još nema komentara