Kolko sam videl na internetu i tv-u, Martinje se naveliko obiležilo širom Podravine a bome su i silni biškupi na Županijskom Martinju imali pune ruke posla. Posebno me veseli kaj je jedan od glavnih biškupi baš naš Koprivničanec, naš Draganovčan Krešimir Blažek. Nekak mi se čini da je to tv-Martinje bilo jako dobro organizirano i, usudil bi se reči, morti i najspektakularnije v celoj severozapadnoj Hrvatskoj. Jedino mi se nekak činilo da v onom velkome šatoru nisam baš videl odgovarjaču papicu. I biškupi i ostali vinoljupci su imali pune ruke čaša z vinom ali nigde nisam videl zalogaje koji bi mamili za čašom dobroga vina. Meni je to nekak navek v prvom planu. Morti nisam bil baš pažljiv gledatelj?
Kak je bilo na Martinju?
Ono kaj sam vam prošli tjedan napisal v jelovniku tak se je uglavnom i dogodilo osim nekih sitnica koje sam mogel samo naslutiti. Naime kaj. Naš vam pajdaš Joso dolazi Zagreba više od pedesetak let skoro na sve goričke svetke ali navek i nekaj donese kakti svoj prilog predjelu. Nije to prepustil ni ovo leto. Njegov “zagrebački pinklec” nije više nikakvo iznenađenje al je navek dobrodošla dopuna gablecu. Kaj je bilo ovo leto v njegvom pinklecu? Evo ovak: luk, češnjak, špek, prezvuršt i jedan ogroman obiteljski feferon. Naravno da su luk i češnjak mam bili kakti prilog i špeku i prezvurštu. Dok to spominjem moram se podsetiti nekih davnih vremena vezano z Josom i češnjakom. Negda davno mi je nestalo češnjaka za jedno jelo i dok sam več štel prejti do naše međašice Treze koja je navel v takvim situacijama bila naš dučan, z čiste zafrkancije sam pital društvo jel neko morti od njih ima glavicu češnjaka? Nisam praf ni završil z pitanjem več je Joso rekel:”Imam ja!”Zvadil je žepa glavicu češnjaka i spasil situaciju. Jemput je pak došel v društvo i izjavil ovo:”Dečki dragi danas sam baš preteral. Jel sam knedle šljivama i češnjaka!” Bilo je još takvih zgoda z češnjakom i dok sam ja to spripovedal svojim ukučanima, Irena ga je prozvala “gospon češnjak.”Da bu stvar interesantna i ona konzumira češnjaka v pristojnim količinama.
*Sl 1: Tak je zgledalo naše skromno ovoletnje krštenje mošta
Dogodila se i jedna neverojatna situacija koju povijest goričarenja mora zapisasti: Atač je pral suđe! Sad bute mislili da ja nekaj zmišljam al verujte da je to živa istina. V jednom momentu več skoro pred fajrunt on se je digel i izjavil:”Idem oprati suđe!” Naravno da smo pomislili kak je to još jedna od njegovih zafrkancija. Kak ga dugo ni bilo išel sam videti gde je. Kad ono fakat, stoji v kuhinji pri sudoperu i več je uspel oprati sve tanjure i escajga. Ranjgle i lonca ni opral jer to još nije savladal. To je ostavil Đuri i meni da rešimo drugi dan. Nisam se mam snašel da taj povijesni događaj ovjekovečim jednom nesvakidašnjom slikicom al je srečom to napravil Jan.
*Sl 2: Scena za povijest Draganovca: Atač pere suđe.
Sl 3: Pranje suđa je teški posel. Treba se malo i odmoriti.
Moram spomenuti još jednu novost koja bi mogla postati normalni događaj v budučnosti. Nakon Vincekova v sečnju, za Martinje nas je pojačala Janova mlada pajdašija. Jan je počel savladavati neke osnove fiškušije. Negda se točno znalo pri Fjaki v kleti ko je bil fiškuš: najmlađi član klape. Tam negde sedamdesetih to je postal Pepek, njega je za vreme vojske jedno vreme menjal Gino, pa se Pepek pak vrnul a onda je jedno dulje vreme to bil Braco. Pri meni je to za neke prigode delal Robi, pa tu i tam Braco i Kruno da bi sad došlo vreme da Jana imenujemo za tu jako odgovornu funkciju. Nije baš lako odgovoriti na sve zahteve ove stare veteranske ekipe. Naša je pak odgovornost da im prenesemo te goričke tradicije i da i oni to prihvate z tolko ljubavi kak smo mi to negda prihvatili od naših starih. Za nekaj malo više od dva meseca za njih bu novi ispit: Vincekovo. Nadam se da bumo imali prilike pak se sastati barem v ovom broju kak i neki dan i tak obilježiti početak radova v goricama. Još ak bu malo snega to bu tek onda pravi gorički zimski ugođaj.
Moram se ispričati za neke stvari koje sam napisal a nisu bile baš dobro prihvačene od strane mojega pajdaša Tonča. Morti se bute setili da sam več v par navrata napisal kak se v zadnjih nekolko let događaju sve češče iznenanđenja. Tonč donira svojega portugisca za promocije naših knjiga naše “Maturanti staroga kova”, za godišnju skupštinu naše Udruge “Gekoma”a za Martinje redovito pokloni i koju litru našoj zagrebačkoj pajdašiji Boču, Josi i Ataču. Naravno da smo i na Martinje imali degustaciju ovoletnjega uroda. Svaki put napišem kak mu je “portugizac ovo leto jako dobar” ali sam propustil napisati ovakvu rečenicu:”Tončov portugizec je vrhunski”. Nadam se da buju svi poklonici te božje kapljice konačno shvatili razliku između “jako dobar portugizec” i “vrhunski portugizec”.
Kaj se tiče jelovnika verojatno ste i vi počeli razmišljati o zimskim delicijama. Zelje je več kiselo, spremamo se za kolinje, hladniji dani iščeju nekaj više kalorija i to bu nekak diktiralo i moje tjedne jelovnike. Siguran sam da bu to tak i pri vama.
Pondelek
Juha/Glavno jelo: Mešana šalata z hrenovkama i kuhanim jajcima; treba malo odmoriti organizam
Desert: Keksi z pudingom od vanilije
Tork
Juha: Kobasičja juha
Glavno jelo: Francuski krumpir, šalata
Desert: Kompot
Sreda
Juha: Koprova juha z krutonima
Glavno jelo: Faširanci, restani krumpir, turšija
Desert: Sok
Četrtek
Juha/Glavno jelo: Čušpajz od slatke repe z junetinom
Desert: Smuti od mešanoga voča
Petek
Juha: Krem juha od graha i mrkve
Glavno jelo: Carsko meso na naglo, dinstani grah z povrčem
Desert: Naravno da tu paše gemišt
Subota
Juha: Bela juha z kašicom
Glavno jelo: Domači rezanci ala karbonara, šalata
Desert: Voče
Nedela
Juha: Anjgemahtec
Glavno jelo: Bolši komadi piceka vu saftu od povrča, luleki od kolko-tolko testa, šalata
Desert: Medena pita, kapučino
:(Još nema komentara